बिर्तामोड । चेक बाउन्ससम्बन्धि मुद्धा मिलाई दिन्छु भनी ठगी गरेको आरोपमा बिर्तामोडबाट एक जना पक्राउ परेका छन् । इलाका प्रहरी कार्यालय अनारमनीले बिर्तामोड ५ का ३६ बर्षीय दिनेश लिम्बूलाई पक्राउ गरेको जनाएको छ ।

लिम्बुले बिर्तामोड ६ बस्ने यामबहादुर बस्नेतलाई चेक बाउन्ससम्बन्धि मुद्धा मिलाई दिन्छु भनेर २ लाख ३० हजार रुपैँया लिएको र थप ४ लाख मागेको प्रहरीले जनाएको छ । बस्नेतले थप रकम दिन सक्दिन भन्दा लिम्बूले धाकधम्की दिएको र आफूलाई ठगी गरेको भन्ने निवेदनका आधारमा लिम्बूलाई माघ २९ गते साँझ सिटी सेन्टर अगाडीबाट पक्राउ गरेको  प्रहरीले जनाएको छ । पक्राउ परेका लिम्बूलाई जिल्ला अदालत झापाबाट म्याद थप गरी अनुसन्धान भईरहेको इलाका प्रहरी कार्यालय अनारमनीका प्रहरी निरीक्षक हरी बरालले जानकारी दिए ।